За Скопје

Има нешто зачудувачки привлечно во градот Скопје и неговата околина. Скопје е натопен со легенди, митови, вистински историски настани, а недвојбено е полн со сè уште неоткриени научни докази. Скопје е поставен на крстопат, освојуван, рушен, пален, подложен на земјотреси, секогаш бил вистинско засолниште на разнородни култури низ вековите.
     Денес Скопје е модерен град, престолнина на самостојна Република Македонија. Урбанистички градот е со недоречени и бесмислени решенија, небаре еден град легнал на друг. Судирите на старите и новите улици и различните култури се така чудно испреплетени така што веруваме дека на туристите ќе им биде многу интересно талкањето низ градот при што ќе ги откриваат ковчезите на културното благо и блесоците на генијалните градители. Во Скопје можете да седнете на некој камен, а да не забележите дека е дел од некогашно величествено здание. Во стариот дел на градот има археолошки слоеви до 6 м длабина. Не случајно, Скопје е едно место на напластени култури.
        Тој е на крстопат на оските исток - запад (азиската) и север - југ (европската) и секогаш бил место на собитија, борби и дијалози. Просторот зрачи и зборува, а времето е тука некако неважно, идеално место за засолниште на разнородни култури, достапно за сите спротивности, малку подзаспано, но крајно отворено. Скопје ве прифаќа, ве опушта и наеднаш сте свесни за минливоста. Чуден некој град, лежерен во своето богатство, свртен со своето сончево лице кон гостите, секогаш мили и драги. Мостовите на реката Вардар го сврзуваат левиот брег - стариот град и неговиот десен брег. Каде и да одите морате да го видите Камениот мост, тој е прекрасен и величествен. Застанати на Камениот мост добивате информација за скопската котлина, која е на 245 м надморска височина. На југ е планината Водно, а на север Скопска Црна Гора. На југозапад се наоѓа планината Сува Гора, а зад неа величествената Шар Планина. Вардар тече шумно, брзајќи кон Егејското Море.
        Добредојдовте во засолништето на цивилизацијата!

Познати личности од Скопје:
-      Мајка Тереза, хуманитарка
-      Милчо Манчевски, режисер
-      Дарко Панчев, поранешен фудбалер
-      Симон Трпчевски, пијанист
-      Срѓан Керим, поранешниот претседател на Генералното собрание на ОН
-      Јахја Кемал Бeјатли, поет и дипломат